18‏/12‏/2008

أول قصة

يارب تكونوا عيدتم وأكلتم فتة ولحمة و رز وحاجات كتيير ،
وتكونوا أخدتم هدنة قبل ما أحكيلكم قصة من قصص الشيكابالا
بس يهمنى رأيكم بصراحة وبدون تحيز
لأن الحكاية دى حصلت مع زوجتى
صدى الصمت
ومش عشان هيه قديمة فى التدوين هتيجوا فى صفها

طبعاً كلنا عارفين قلعة صلاح الدين وجامع محمد على
عشان دول من أهم الآثار الإسلامية وأكيد كلنا درسناهم وإحنا صغيرين
وأغلبنا زار القلعة ويعرف عنها ولو معلومات بسيطة
(قشور يعنى)

وبداية المهزلة الشيكابالية كانت الساعة 10 مساءً
وأنا طالع كوبرى السيدة عيشة وكانت طبعاً زوجتى معايا
(ماهو صعب جداً جداً حد يخرج ومراتة تسيبة لوحدة كدة
لازم رجلها على رقبتة ....أخ قصدى على رجلة )
المهم ، فجأة وبدون إنذار
نزل عليا جردل ميه ساقعة وحسيت إنى هأموت

عارفين الجردل دة كان ايه؟
كانت جملة قالتها زوجتى العزيزة بمنتهى التلقائية :
زوجتى :
إيه دة ؟ القلعة منورة كدة ليه ؟
هوة مش رمضان خلص خلاص !!
وله مكسلين يشيلوا الزينة والنور؟؟؟
أنا :
يا ماما دى أنوار ثابتة مالهاش دعوة بالمناسبات
إتعملت بعد دراسة وتحت إشراف وزارة الثقافة
زوجتى: نعم م م م م !!! لية والثقافة مالها ومال القلعة
هيه لوحة فنية وله ايه ؟؟؟؟
أنا : لأ مش لوحة بس دى أثر
زوجتى : ما أنا عارفة طبعاً
بس تصدق إحنا مش بنعرف نحافظ على الآثار
ليه نسيبها مقشرة ومبهدلة كدة
كنا المفروض ظبطناها
أنا : إزاى بقى نظبطها يعنى ؟
زوجتى : نغير السور القديم بسور رخام ونركب ألوميتال
ونديها وش دهان جديد
هيه هتتكلف بس هتبقى فى الآخر تحفة
بصراحة أنا مأقدرتش أرد ولا أنطق
كل ال عملتة ركنت العربية عند أول محل عصير
ونزلت سألت الراجل فبصلى بإستغراب جداً
عشان السؤال بجد كان غريب على ودنة شوية
عارفين طلبت ايه ؟؟؟
طلبت كوباية ميه بسكر عشان أقدر أوصل البيت سليم
حقى بقى أتفرس وله لأ ؟؟؟
تحذير :
النفاق ممنوع ، والتحيز مرفوع ،

ويلا شيكابالا شيكابالا

09‏/12‏/2008

تاج العيد

كنت قاعد فى حالى بأفتكر حالى قبل الجواز (كانت أيام حلوة)
لقيت مراتى بتفوقنى وتقولى
جالك تاج يا شيكابالا
قلت أحمدك يارب
كل ال يجيبو ربنا كويس
التاج دة من (مواطن مصرى نايم)
أشكرك على إهتمامك وهديتك :
التاج
ماذا يمثل لك العيد ؟ وما أكثر شىء يبهجك فى مظاهر العيد؟
فرحة-لبس جديد -أستحمام-عيدياااات.
واكبر فرحة انى باخد اجازة فى العيد
-----------------------------------
أوصف لنا طقوسك فى العيد من ليلة العيد لآخر يوم ؟
تبادل التهانى-توديع الخروف-عمل خطة وبرنامج الفسحة-
الإستعداد لصلاة العيد - أنام - أزور الأهل -
آكل فتة ولحمة طبعاً 5 أيام من غير ما أزهق
--------------------------------
أحكى لنا أطرف موقف حصلك فى العيد ؟
كنت متفق مع جزار عشان الأضحية ولما رحتلة بعد الصلاة
لقيتة مات ومالاقيتش جزار تانى فاضى
فخبطت الخروف بالعربية وسلختة
وكل سنة وانتم طيبين
------------------------------
يتحرص على تهنئة الأهل والأقارب والأصدقاء ولة مش بتهتم ؟
بأهتم جداً عشان العيدية
-------------------------
مين أول حد تزورة أو تكلمة عشان تهنية بالعيد ؟
والدى و والدتى (ربنا يخليهملى )
إخوتى و جورج بوش الأب
---------------------
اية الفرق بين العيد الحالى والعيد أيام الطفولة ؟
فرق كبييير
زمان كنت مهيص وبأخد عيديات
دلوقت متدبس وبأدى عيديات
وبأجيب لبس وبمب وصواريخ (بس مش ليا)
-----------------------
كلمنا عن ذكرياتك فى العيد ؟
للأسف بعد الجواز الذاكرة هنجت والزاهايمر تشعب وانتشر
مش فاكر أى حاجة
----------------------
تفتكر الحياة من غير عيد هتفرق كتير ؟
جداً جداً جداً
و دة سر ما أقدرش أقولة
---------------------
اية أجمل رسالة تهنئة بالعيد وصلتك ؟ ومن مين ؟
تهنئة حارة مولعة
بأعياد جميلة مشخلعة
ومعاها بمب وفرقعة
للناس المدلعة
بعتتهالى بنتى مراميرو
----------------
لسة بتاخد عيدية ؟من مين ؟ وبتديها لمين ؟
ياريييييت ، لكن للأسف بأدى عيديات لطوب الأرض
------------------------
اية رأيك فى التاج ؟
تحفة وجميل
--------------------
تحب تمرره لمين ؟
زوجتى (صدى الصمت )
أخو زوجتى (المراكبى )
أخت زوجتى (دردشة عالماشى )
وبعد كدة الدعوة عامة وكل ال يدخل يقرأ
معزوم عالعشاء وعالتاج وبأهديهوله

04‏/12‏/2008

ماهى الشيكابالا ؟

ياللى نصـحت الناس بشــرب النبيت
مع بنت حلوه . . وعود ، وضحك ، وحديت
مـش كنت تنصـحهم منين يكسـبوا تمن ده كـله ؟
و له يمـكن نسـيت ؟!!!!!
عـجبى !!

حبيت انى أبدأ مدونتى بكلمات الراحل صلاح جاهين
حيث أنها تحوى بين سطورها أدق معانى ( الشيكابالا )
لا تتعجبوا أصدقائى وصديقاتى فنحن جميعاً نحيا حياة الشيكابالا
البعض يسميها ( مية البطيخ )
وآخرون يسمونها ( أهى عيشة والسلام )
ولكنى إخترت لها إسم ( الشيكابالا )
،
ماهى الشيكابالا ؟
هى المنفذ الوحيد لإستمرار الحياة
عندما يهبط الإنسان على أرض الواقع ويحيا
فيجدة مختلف كل الإختلاف عن أحلامة أو عن ما تمناه ،
ودرجات الإختلاف متفاوتة من شخص لآخر
ولكن فى النهاية فهو إختلاف
سواء كان كبيراً أم صغيراً
،
وهنا يكون أمام الشخص خيارين لا ثالث لهما :
إما أن يكتئب ويحزن وتتوقف به الحياة
ويحيى حياة الجمود والرتابة والضجر
ويكرس حياتة ودخلة لشراء الأدوية
وجهاز لقياس ضغط الدم وآخر لقياس نسبة السكر ،
وإما أن يكيف ويتكيف مع الحياة ويكون ذلك عن طريق
الشيكابالا بتفاصيلها وخطواتها .
،
أصدقائى الأعزاء
سأترككم لوقفة مع النفس والحياة
من خلال الواقع وشريط الذكريات
وفى البوست القادم سأحكى لكم
أولى قصصى مع الشيكابالا
دمتم لى أصدقاء أعزاء حلوين
وسلام