09‏/10‏/2009

فرافيش

فرافيييش .. فرافيييش .. فرافيييش

علشان زحمة المدارس والشوارع ومذاكرة الاولاد
حبيت اخرج انا وصدى الصمت من الجو الكئيب دة
ونضحك شوية بنكت عبيطة حبتين
وأهى ضحكة احسن من مافيش
.................
واحد شيكابالا متجوز أربعة
لبنانية وسورية وامريكية و مصرية
قام يصلي الفجر
سمع خروشة في الصالون... راح يشوف في إيه..
لقي الأمريكية على جهاز الرياضة
قاللها إيه مصحيكي بدري؟
قالتلو...
my dear

لازم أحافظ على رشاقتي ولياقتي وأعمل إيروبكس كل يوم

قام سمع خروشة في المطبخ .. راح يشوف في إيه...
لقي السورية بتعمل فطور...
قاللها إيه مصحيكي بدري؟
قالتلو ...
إبن عمي... تئبرني .. هالكم حبة كبة وصحن تبولة...
ما هاين علي تطلع على ريء بطنك

قام سمع خروشة بغرفة النوم
راح يشوف في إيه... لقي اللبنانية قدام المراية بتتزين
قاللها إيه مصحيكي بدري؟
قالتلو..
حياتي ... عم جهز حالي لإلك ...عشان تصطبح بأحلى وش...
بس تخلص صلاة ناطرتك يا روحي

قام سمع خروشة في الكرويدور راح يشوف فيه إيه
لقي المصرية ناكشة شعرها وبتتمطع وتتثائب ولابسة الترينج اللي نايمة بيه
قاللها إيه مصحيكي بدري؟
قالتلو


ييييييييييية....


وأنت مال أمك ؟.......
أنا رايحة الحمام وراجعة أنام

********************************
واحد قال لمراته : تعرفي إن الخلفاء العباسيين كان لهم ألقابهم زي
(المعتصم بالله) (المتوكل على الله) (الواثق بالله)
فلو كنت أنا منهم فكرك أي لقب كان يناسبني ,
قالت: إما (أعوذ بالله) أو (منك لله)
**************
واحدة بتقول لزوجها : اذبح خروف بمناسبة مرور 10 سنوات على زواجنا.
قاللها : طب وايه ذنب الخروف في غلطه ارتكبها حمار؟؟
**************
واحد فاز بمليون دولار
راح يبلغ مراته ،
مراته ماتت من الفرحة لما سمعت الخبر
قال : سبحان الله ، الخير لما بيجي ، بيجي كلّه مرّة وحدة
**************
غبي شاف يافطة مكتوب عليها مزرعة أبقار
سأل راعي المزرعة إزاى بتزرعوا البقر ؟؟
قاله الراعي بإستعباط : نرش سكر وبيطلع بقر
راح الغبي رش سكر فى حوش بيتهم
رجع تاني يوم شاف النمل متجمعين
قال : سبحان الله البقر شكله حلو قوى وهمه صغيرين
**************

هأهأهأهأهأ
وكل ضحكة وإنتم مبسوطين

17‏/07‏/2009

نصايح لوجة الله

بعد سنين الحبس
أخ ...
قصدى سنين الزواج السعيد
قررت إنى أنبهكم وأديكم شوية نصايح حتى تمر عليكم
العواصف الزوجية والأمطار الموسمية المنزليه بسلام وأمان


وإليكم بعض النصائح :
* لو مراتك قعدت تتكلم جنبك وتحكى فى قصص مالهاش لزمة (كالعادة)
طنش وركز فى أى حاجة تانية هتلاقيها سكتت

،
* أما لو بدأت تندمج فى قصص ومشاكل صديقاتها إل مابتنتهيش وغالباً بتكون حكيتهالك 20 مرة قبل كدة
تعمل نفسك نايم على طول حتى ولو كنت واقف مش مهم
المهم إنك تشخر وتسيبها تعيش حياتها

،
* ولو قعدت جنبك تتفرج على مسلسل نور ومهند أو ماشابه
تعرف على طول إن دى بداية خناقة وتقطيم
وهتفتح عليك وجه مقارنة مالهاش أى منطق أو لزمة

تقوم على طول تركن على الريموت بكوعك (قال يعنى ماكانش قصدك)
وتجيب فيلم مليان دم وقتل أو تجيب المصارعة الحرة مثلاً
ولو حكمت رأيها وأصرت إنها تقلب على المسلسل

(شد سكينة الكهرباء )
عادى يعنى يــامــا النور بيقطع فجأة

،
** ولما تلاقيها رايقة وهادية (على غير العادة)
تعرف إنها بتفكر إزاى تخليك تزود مصروف البيت
ساعتها تجرى تفتح أى قناة أغانى
وتقعد تتفرج على البنات ال بترقص وإنت مركز فى ال tv قوى
ولما تنده عليك وتقولك عاوزاك
ماتردش وشاورلها بإيدك من فوق لتحت بمعنى : إصبرى شوية
هتلاقيها إحمرت وإخضرت وبقت شبه الفحلق
(طبعاً كلكم عارفينه)
فإنت تبصلها بإستغراب وبمنتهى الهدوء وتقولها :
مالك يا حبيبتى فية إيه ؟
حصل حاجة مزعلاكى ؟
ومش هأحكيلك بقى إية ممكن ينفجر فى وشك بعدها مش مهم
بس المهم إنها هتكون نسيت إن فيه إختراع إسمه مصروف بيت أصلاً
,
** أما بقى لو مراتك عاوزة تخرج وشغلت الزنانة
وسلطت عليك الأولاد عشان تتخنق وتوافق غصب عنك
على طول ومن غير تفكير تعمل نفسك عيان

يعنى مثلاً جالك برد فى معدتك أو ضغطك عالى
وممكن كمان تتهمها بإنها هيه السبب فى إن جالك الضغط
وإنك كنت صاغ سليم قبل الجواز
وتقعد فى السرير ساعتين لحد العيال ماتزهق وتنام
وبعد كدة تقوم وتلبس هدومك وتروح ناحية الباب
وطبعاً هتسألك رايح فين ؟
هترد تقولها بقرف : نازل أقيس ضغطى فى الصيدلية
وقبل ماتقفل الباب تقولها : نامى إنت يمكن أتأخر شوية
هتستغرب وتقولك : لية ده قياس الضغط مابيأخدش غير ربع ساعة
تقوم قايلها : أصلى هأقعد مع أصحابى على القهوة شوية
وتقفل الباب بسرعة وتنزل جرى
بس تحاول ماترجعش فى نفس اليوم عشان

أنا مش متأكد إذا كانت مراتك عندها أكياس بلاستيك كفاية فى اليوم دة
ولة لسة هتشترى وتجهز الساطور
وكل بوست وإنتم طيبين وحلوين وعايشين
مع تحيات شيكابالا

11‏/04‏/2009

فرصة ماتتعوضش

النهاردة مراتى خرجت تزور ناس قرايبها

وأخيراً جاتلى الفرصة إنى أقعد عالنت شوية

وأفضفض من وراها عن

(الجواز وسنينة)

وإليكم مواقف تعبر عن معنى الجواز كما قال المؤرخون وتناقلته الأجيال عبر الإيميلات :
الموقف الأول :

رجل يقول للطبيب: هل هناك طريقة لإطالة العمر؟؟؟؟
رد الطبيب: تزوج ؟
الرجل: هل سيساعدني ذلك؟؟؟؟

الطبيب: لا.... ولكن فكرة العمر الطويل لن تراودك مجدداً مطلقاً

الموقف التانى :

الزوجة: حبيبي ... اليوم هو عيد زواجنا .. ماذا سنفعل حيال ذلك؟؟؟
الزوج: فلنقف دقيقتان حداداً علي هذة الذكرى .



فكرة غريبة ومضحكة ايضا
عندما يتناقش الناس حول قضية الزواج عن حب ام الزواج التقليدي
إنة بمثابة المناقشة حول الإنتحار أم الموت قتلاً
فالمحصلة واحدة في النهاية !!!


قبل الزواج: لا ينام الرجل مفكرا في كلام قد قالتة المرأة
بعد الزواج: ينام فورا وقبل ان تكمل المرأة حتي كلامها معه


أخ خ خ .....

الظاهر هتحصل أزمة دبلوماسية بعد دقيقتين

أصل صدى الصمت رجعت

أكملكم المرة الجاية وألحق أزوغ دلوقت

سلام

05‏/03‏/2009

شوفتوا الهدية ؟

أخباركم اية بعد عيد الحب ؟؟
ياترى جاتلكم هدايا وله لأ ؟؟
أنا جيت النهاردة أشهدكم على هدية صدى الصمت ليا
بعتت لى تاج وطبعاً تقصد تعرف منه شوية أسرار عنى

وكان لازم أبعتلها حاجة أنا كمان
قبل ما أرد على التاج
صورتنا وإحنا مع بعض

حلوين وزى القمر مش كدة ؟؟؟

نبتدى بقى

1- لو كان ينفع تختار عصر تعيش فيه هيبقى انهى؟ ومين الحاكم؟
العصر الرومانى والحاكم هو طرمنييوس اله الضياع
.2- إيه اكتر حاجه بتحبها فى رمضان؟
لمة العيلة اول يوم
3- اوصف أجمل فطار ممكن تفطره؟
خروف محشى حمام باللحمة المفرومة
4- لو انت حاكم هتكون عادل ؟ وهتعرف ازاى ؟
هحاول طبعا وربنا يوفق
.5- مين أكتر اعلامى بتحبه؟
شعبان عبد الرحيم
6- لو ممكن شغلانه تانيه تختار ايه؟
قبطان اعالى المراجيح الدوارة
.7- تانى بلد تحب تعيش فيه بعد مصر ؟
لو لم اكن مصريا لوددت ان اكون مريخيا
.8- اوصف ترتيبات أجمل فرح ممكن تحضره؟
زفة بالكمان وحديقة مش قاعة والصبح مش بالليل
9- بتراعى كلام الناس والقيل والقال؟ وليه؟
لا طبعا علشان الناس كدة كدة بتتكلم
10-صحيت من النوم لا موبايل ولا كمبيوتر ولا كاميرا ديجيتال ورجعنا لعصر الحصنه والحمام الزاجل؟
هكون سعيد جدا
11-لما بتحب تهرب من كل حاجه بتروح فين ؟
ميدان التحرير لحظة خروج الموظفين
.12-امتى أول مره أخدت فيها نفس وقلت ياااااااه أنا كبرت؟
لما حد بيقولى يا عمو
.13-بتشرب سجاير ولا لا؟ وايه رأيك فى الرجاله والستات اللى بتشرب؟
ايوة بشرب ، لا تعليق
.14- بتعرف ايدك الشمال ازاى؟
هاتف بيقولى دى الشمال
.15- اكتر اله موسيقيه بتحبها؟
الكمنجة والعود
.16- ليه الذوق والنخوه اتعدموا؟
منعدموش وزى مافية الكويس فية الى مش كويس وعجبى
.17- ايه الحاجه اللى لو حصلت هبقى سعيد ؟
احقق حلم حياتى وامل عمرى
18- تحب أرض زراعيه ولا اجنس عربيات ولا كام عماره ولا فلوس فى البنك؟
احب الانتخة
.19- تحب؟ البحر ولا النيل؟
النيل
مركب ولا طياره؟
طيارة
.شخص مجنون ولا عاقل؟
عاقل
.تقرا كتاب ولا تتفرج على فيلم ؟
فيلم او كتاب قبل النوم
االتاج لمين؟
يا مراكبى –دردشة على الماشى-عجبى- الدعوة عامة

25‏/01‏/2009

قصة إمبارح

هييييه الأنتخة نعمة
إمبارح صحيت بعد ميعادى بنص ساعة
وطبعاً دة بالنسبالى أنتخة مابعدها أنتخة
لأ لأ لأ دى مش أنتخة وبس دى بلطجة كمان
المهم لقيت قدامى وقت طويل قبل ما أنزل
عشان أروح مشوار كان ورايا
فقررت أستمتع بالوقت دة
وأول حاجة عملتها إنى رجعت لزمن
الراديو


ونسيت تماماً الدش وال دى فى دى والكمبيوتر

وشغلت الراديو وبدأت فى إعداد كوب شاى مظبوط
وبعدها وبسبب أغنية عادية جداً جداً فى الراديو

رجعتنى لأيام كنت قربت أنساها
أيام المدرسة
ياااااااه كانت أيام جميلة قوى


والأغنية كانت أغنية

نجاح سلام : بالسلامة ياحبيبى بالسلامة
وفكرتنى بطقوس كانت الست الحاجة بتعملها:
كانت بعد ما تصلى الفجر تدخل المطبخ
علشان تجهز الساندوتشات واللبن وغيرة
وبعدها تصحينى أنا وأخواتى عشان نلبس
وكان الراديو بيكون شغال ولما كنت بأسمع أغنية

بالسلامة ياحبيبى بالسلامة
كان معناه انى لازم ألحق الباص بتاع المدرسة
وإلا هيفضل يضرب كالاكسات تصحى الشارع كله
المهم كل دة فكرنى ب3 حاجات كمان كانت بتيجى فى الراديو:

* عزيزى قائد السيارة
*
أغنية أم البطل لشريفة فاضل
* كلمتين وبس للراحل فؤاد المهندس
بجد بجد كانت أيام حلوه

مش كدة وله ايييييه ؟

15‏/01‏/2009

آآآآآآه يا حبيبتى

ياااااااااااااااااااااه
أخيراً رجعت للتدوين
دة أنا كنت قربت أنسى التدوين والمدونات
بس الحمد لله رجعت بالسلامة بعد طول غياب ومش لا سمح الله كنت نايم ولا مأنتخ لا
لكن كنت فى دوامة الحياة والشغل والتفكييييييير .
ولقيت ان أفضل طريقة لخروجى من الدوامة دى انى اكتب
والفضل فى دة طبعا يرجع لاصرار كبير جدا من زوجتى
على الكتابة والتدوين وانى اكتب بوست جديد .
وعلشان طبعا لازم اكون دبلوماسى واسمع كلامها حاولت اكتب
لقيت جوايا كلام كتييير ومواضيع أكتر مايكفيها ألف بوست
لكن لما بأسرح فى أشعار وكتابات نزار قبانى
دايماً بأتوقف عند قصيدة جميلة جداً بتأثر فيا
وحبيت النهاردة أهديها لك محبى الشعر :

أقول أمام الناس لستِ حبيبتى -- وأعرف فى الأعماق كم كنت كاذباً
وأزعم أن لا شىء يجمع بيننا -- لأبعـد عن نفسـى وعنك المتاعبـا
أنفى إشاعات الهوىوهىحلوة--وأجـعـل تـاريخـى الجـميـل خرائبـا
وأقـتل عـطرى عـامداً متعـمـداً--وأخـرج مـن جنـات عـينيك هاربـا
أقوم بدور مضحكٍ يا حبيبتـى -- وأرجع من تـمـثيـل دورى خائــبـا
فلا الليل يخفى لو أراد نجومه -- ولا البحر يخفـى لو أراد المراكبـا
ويارب القصيدة تعجبكم
ويلا شيكابالا شيكابالا

18‏/12‏/2008

أول قصة

يارب تكونوا عيدتم وأكلتم فتة ولحمة و رز وحاجات كتيير ،
وتكونوا أخدتم هدنة قبل ما أحكيلكم قصة من قصص الشيكابالا
بس يهمنى رأيكم بصراحة وبدون تحيز
لأن الحكاية دى حصلت مع زوجتى
صدى الصمت
ومش عشان هيه قديمة فى التدوين هتيجوا فى صفها

طبعاً كلنا عارفين قلعة صلاح الدين وجامع محمد على
عشان دول من أهم الآثار الإسلامية وأكيد كلنا درسناهم وإحنا صغيرين
وأغلبنا زار القلعة ويعرف عنها ولو معلومات بسيطة
(قشور يعنى)

وبداية المهزلة الشيكابالية كانت الساعة 10 مساءً
وأنا طالع كوبرى السيدة عيشة وكانت طبعاً زوجتى معايا
(ماهو صعب جداً جداً حد يخرج ومراتة تسيبة لوحدة كدة
لازم رجلها على رقبتة ....أخ قصدى على رجلة )
المهم ، فجأة وبدون إنذار
نزل عليا جردل ميه ساقعة وحسيت إنى هأموت

عارفين الجردل دة كان ايه؟
كانت جملة قالتها زوجتى العزيزة بمنتهى التلقائية :
زوجتى :
إيه دة ؟ القلعة منورة كدة ليه ؟
هوة مش رمضان خلص خلاص !!
وله مكسلين يشيلوا الزينة والنور؟؟؟
أنا :
يا ماما دى أنوار ثابتة مالهاش دعوة بالمناسبات
إتعملت بعد دراسة وتحت إشراف وزارة الثقافة
زوجتى: نعم م م م م !!! لية والثقافة مالها ومال القلعة
هيه لوحة فنية وله ايه ؟؟؟؟
أنا : لأ مش لوحة بس دى أثر
زوجتى : ما أنا عارفة طبعاً
بس تصدق إحنا مش بنعرف نحافظ على الآثار
ليه نسيبها مقشرة ومبهدلة كدة
كنا المفروض ظبطناها
أنا : إزاى بقى نظبطها يعنى ؟
زوجتى : نغير السور القديم بسور رخام ونركب ألوميتال
ونديها وش دهان جديد
هيه هتتكلف بس هتبقى فى الآخر تحفة
بصراحة أنا مأقدرتش أرد ولا أنطق
كل ال عملتة ركنت العربية عند أول محل عصير
ونزلت سألت الراجل فبصلى بإستغراب جداً
عشان السؤال بجد كان غريب على ودنة شوية
عارفين طلبت ايه ؟؟؟
طلبت كوباية ميه بسكر عشان أقدر أوصل البيت سليم
حقى بقى أتفرس وله لأ ؟؟؟
تحذير :
النفاق ممنوع ، والتحيز مرفوع ،

ويلا شيكابالا شيكابالا