17‏/07‏/2009

نصايح لوجة الله

بعد سنين الحبس
أخ ...
قصدى سنين الزواج السعيد
قررت إنى أنبهكم وأديكم شوية نصايح حتى تمر عليكم
العواصف الزوجية والأمطار الموسمية المنزليه بسلام وأمان


وإليكم بعض النصائح :
* لو مراتك قعدت تتكلم جنبك وتحكى فى قصص مالهاش لزمة (كالعادة)
طنش وركز فى أى حاجة تانية هتلاقيها سكتت

،
* أما لو بدأت تندمج فى قصص ومشاكل صديقاتها إل مابتنتهيش وغالباً بتكون حكيتهالك 20 مرة قبل كدة
تعمل نفسك نايم على طول حتى ولو كنت واقف مش مهم
المهم إنك تشخر وتسيبها تعيش حياتها

،
* ولو قعدت جنبك تتفرج على مسلسل نور ومهند أو ماشابه
تعرف على طول إن دى بداية خناقة وتقطيم
وهتفتح عليك وجه مقارنة مالهاش أى منطق أو لزمة

تقوم على طول تركن على الريموت بكوعك (قال يعنى ماكانش قصدك)
وتجيب فيلم مليان دم وقتل أو تجيب المصارعة الحرة مثلاً
ولو حكمت رأيها وأصرت إنها تقلب على المسلسل

(شد سكينة الكهرباء )
عادى يعنى يــامــا النور بيقطع فجأة

،
** ولما تلاقيها رايقة وهادية (على غير العادة)
تعرف إنها بتفكر إزاى تخليك تزود مصروف البيت
ساعتها تجرى تفتح أى قناة أغانى
وتقعد تتفرج على البنات ال بترقص وإنت مركز فى ال tv قوى
ولما تنده عليك وتقولك عاوزاك
ماتردش وشاورلها بإيدك من فوق لتحت بمعنى : إصبرى شوية
هتلاقيها إحمرت وإخضرت وبقت شبه الفحلق
(طبعاً كلكم عارفينه)
فإنت تبصلها بإستغراب وبمنتهى الهدوء وتقولها :
مالك يا حبيبتى فية إيه ؟
حصل حاجة مزعلاكى ؟
ومش هأحكيلك بقى إية ممكن ينفجر فى وشك بعدها مش مهم
بس المهم إنها هتكون نسيت إن فيه إختراع إسمه مصروف بيت أصلاً
,
** أما بقى لو مراتك عاوزة تخرج وشغلت الزنانة
وسلطت عليك الأولاد عشان تتخنق وتوافق غصب عنك
على طول ومن غير تفكير تعمل نفسك عيان

يعنى مثلاً جالك برد فى معدتك أو ضغطك عالى
وممكن كمان تتهمها بإنها هيه السبب فى إن جالك الضغط
وإنك كنت صاغ سليم قبل الجواز
وتقعد فى السرير ساعتين لحد العيال ماتزهق وتنام
وبعد كدة تقوم وتلبس هدومك وتروح ناحية الباب
وطبعاً هتسألك رايح فين ؟
هترد تقولها بقرف : نازل أقيس ضغطى فى الصيدلية
وقبل ماتقفل الباب تقولها : نامى إنت يمكن أتأخر شوية
هتستغرب وتقولك : لية ده قياس الضغط مابيأخدش غير ربع ساعة
تقوم قايلها : أصلى هأقعد مع أصحابى على القهوة شوية
وتقفل الباب بسرعة وتنزل جرى
بس تحاول ماترجعش فى نفس اليوم عشان

أنا مش متأكد إذا كانت مراتك عندها أكياس بلاستيك كفاية فى اليوم دة
ولة لسة هتشترى وتجهز الساطور
وكل بوست وإنتم طيبين وحلوين وعايشين
مع تحيات شيكابالا

هناك 4 تعليقات:

يا مراكبي يقول...

ياسلام عالنصايح الهايلة .. احنا مش عارفين من غيرك كنا عملنا ايه بصراحة

متأكد ان النصايح دي امان وما بتجيبش آثار جانبية تفضي الى الموت او الاغتيال مثلا؟

على ضمانتك والا بتبعتنا؟

ههههههه

الازهرى يقول...

ما هو قلنا نصايح مجرب
يبقى صعب ؟

لان اكيد مش كل مرة وتسلم الجرة
وبكده كان يبقى فى اصابات كتير

يا عم طمنا نشتغل بيها على بركة الله والا نسمعها ونعجب بس؟

Kiara يقول...

اعملوا حسابكم

بنكون جايبين اكياس عشان نحط فيها الخزين دا للستات المتجوزه وكمان بنجيبها جمله يعني في اكياس تكفي لكل حاجه وكمان السواطير دا شي لازم امال هنقطع الجثه ازاي يوه اقصد اللحمه ازاي

وكمان بقي ايييييييييييه

ولا بلاش الطيب احسن

الازهرى يقول...

كل عام وانت بخير بمناسبة عيد الفطر المبارك اعاده الله علينا وعلى المسلمين بالخير واليمن والبركات